MUHIM: Agar siz Hindistonda yashasangiz, sizga tegishli Google Pay Xizmat shartlari bu yerda keltirilgan. Agar AQSHda yashasangiz, sizga tegishli Google Pay Xizmat shartlari bilan bu yerda tanishing.
Oxirgi tahrir: 2026-yil 27-oktabr
Google Pay Google Xizmat shartlariga (“Google Xizmat shartlari”) muvofiq taqdim etiladi va Google Xizmat shartlarida belgilanganidek, “Xizmat” hisoblanadi. Quyidagi Google Pay Xizmat shartlari Google Paydan foydalanishga tatbiq etiladigan qoʻshimcha shartlardir. Google Paydan foydalanishingiz ushbu Google Pay Xizmat shartlari va Google Xizmat shartlariga (ushbu Google Pay Xizmat shartlari maqsadlarida biz ularni birgalikda “Shartlar” deb ataymiz) muvofiq amalga oshiriladi. Google Payments Maxfiylik eslatmasida Google sizning toʻlov maʼlumotlaringiz bilan qanday ishlashi tavsiflangan.
Agar Google Pay Xizmat shartlari hamda Google Xizmat shartlari oʻrtasida biron-bir ziddiyat yuzaga kelsa, Google Pay Xizmat shartlari ustuvor kuchga ega boʻladi. Shartlarning ingliz tilidagi talqini va boshqa tilga tarjima qilingan versiyasi oʻrtasida biron-bir tafovut yuzaga kelsa, ingliz tilidagi matn ustuvor kuchga ega boʻladi.
Google Pay’ning ayrim funksiyalari avval “Android Pay” brendi ostida taqdim etilgan. Doʻkonlarda, ilovalarda yoki veb-saytlarda Android Payga oid eskirgan nomlarni koʻrishda davom etishingiz mumkin boʻlsa-da, ushbu funksiyalardan foydalanish mazkur Shartlar bilan tartibga solinadi.
Google Pay xizmatidan foydalanish uchun quyidagi shartlarga rozilik berishingiz talab etiladi. Ularni diqqat bilan oʻqib chiqing. Ayrim mahsulotlar va funksiyalar hamma mamlakatlarda ham mavjud boʻlmasligi mumkin. Batafsil axborot uchun Google Pay yordam markaziga kiring.
Shartlarga rozilik bildirish orqali siz quyidagilarni tasdiqlaysiz:
Shuningdek, sizga Google hisobi, Xizmatning vaqti-vaqti bilan oʻzgarib turishi mumkin boʻlgan tizim va muvofiqlik talablariga javob beradigan qurilma, barqaror internet aloqasi hamda mos dasturiy taʼminot kerak boʻladi. Ushbu omillar Google Pay xizmatidan foydalanish imkoniyatingizga hamda uning unumdorligiga ta’sir koʻrsatishi mumkin. Bunday tizim talablari sizning zimmangizda.
Agar siz oʻz Google hisobingizni boshqarish uchun talab qilingan yoshga yetmagan boʻlsangiz, Xizmatdan foydalanish uchun ota-onangiz yoki qonuniy vasiyingizdan ruxsat olishingiz shart. Ushbu Shartlarni ota-onangiz yoki qonuniy vasiyingiz bilan birgalikda oʻqib chiqing.
Agar siz ota-ona yoki qonuniy vasiy boʻlsangiz va farzandingizga Xizmatdan foydalanishga ruxsat bersangiz, u holda ushbu Shartlar sizga nisbatan tatbiq etiladi hamda farzandingizning Xizmatdagi faoliyati, jumladan, u tomonidan amalga oshirilgan har qanday tranzaksiyalar uchun bevosita siz javobgar boʻlasiz. Shuningdek, farzandingiz karta egasi ekanini yoki uning Google hisobiga saqlangan har qanday toʻlov usulidan foydalanishga vakolati borligini tasdiqlaysiz.
Google Pay quyidagilarni Google hisobingizga saqlash, ularni bitta joyda boshqarish hamda ular orqali Google va uchinchi tomonlar bilan hisob-kitoblarni amalga oshirish imkonini beradi:
Google Pay yordamida Google hisobingizda turli xil toʻlov usullarini saqlashingiz va boshqarishingiz mumkin (bular birgalikda “Toʻlov usullari” deb ataladi), jumladan:
Muayyan toʻlov usulidan foydalanish imkoniyati yoki uning Google Pay bilan mosligi siz yashayotgan mamlakat va boshqa omillarga bogʻliq boʻlishi mumkin. Mos keladigan Toʻlov usullari turlari, shuningdek, quyida tavsiflangan Toʻlov usullaridan foydalanish tartibi va Google Pay funksiyalari hamma yerda ham mavjud boʻlmasligi hamda istalgan vaqtda oʻzgarishi mumkin.
Toʻlov usulini Google hisobingizga turli foydalanuvchi interfeyslari, jumladan, Google Pay ilovasi yoki veb-sayti, Google Chrome brauzeri, toʻlov usuli emitentining ilovasi yoki veb-sayti yoxud Google Play Market kabi Google mahsuloti yoki xizmati orqali saqlashingiz mumkin. Toʻlov usulini saqlash uchun sizga taqdim etilgan barcha roʻyxatdan oʻtish shakllaridagi barcha majburiy maʼlumotlarni toʻldirishingiz lozim. Siz taqdim etadigan maʼlumotlar dolzarb, toʻliq va aniq boʻlishi shart hamda ularning doim shunday boʻlishini taʼminlashingiz lozim. Google Pay’dan foydalanishda davom etishingiz uchun yoki sizga ushbu xizmatdan foydalanishga ruxsat berish masalasini koʻrib chiqish maqsadida sizdan qoʻshimcha maʼlumotlar talab qilishimiz mumkin.
Toʻlov usulini saqlaganingizda, Google sizning ismingiz va toʻlov manzilingiz kabi ushbu toʻlov usuliga oid maʼlumotlarni xotirada saqlashi mumkin. Google Pay shuningdek, Google hisobingizga yetkazib berish manzili kabi boshqa maʼlumotlarni saqlash imkonini beradi — bu esa xarid va toʻlovlarni yanada tezroq amalga oshirishga yordam beradi.
Siz bizga Toʻlov usulingiz oʻz taʼminotchisi bilan yaxshi holatda ekanligini tasdiqlash vakolatini berasiz; bu, jumladan, lekin shu bilan cheklanmagan holda, tarmoq qoidalari yoki Toʻlov usuliga nisbatan qoʻllanadigan boshqa talablarga muvofiq, toʻlovni avtorizatsiya qilish soʻrovini yuborish va/yoki Toʻlov usulidan kichik miqdordagi mablagʻni yechib olish (debet) va/yoki qaytarish (kredit) orqali amalga oshirilishi mumkin.
Google Pay xizmatidan shaxsiy toʻlov usullaringiz orqali faqat shaxsiy maqsadlarda foydalanishga rozilik bildirasiz. Agar Google Pay xizmatidan mos keluvchi korporativ karta orqali foydalansangiz, buni ish beruvchingizning ruxsati bilan amalga oshirayotganingizni hamda ish beruvchingiz nomidan ushbu Shartlar boʻyicha majburiyat olish vakolatiga ega ekanligingizni tasdiqlaysiz.
Google yoki uning filiali emitent boʻlgan holatlar bundan mustasno, na Google va na uning filiallari toʻlov usullaringizga oid karta egalari kelishuvlari, maxfiylik siyosati yoki boshqa foydalanish shartlarining ishtirokchisi hisoblanmaydi. Ushbu Shartlardagi hech bir qoida bunday emitent shartlariga oʻzgartirish kiritmaydi. Ushbu Shartlar hamda emitentingiz shartlari yoki maxfiylik siyosati oʻrtasida biror-bir ziddiyat yuzaga kelsa, Google Pay xizmatiga oid masalalarda siz va Google oʻrtasidagi munosabatlar mazkur Shartlar bilan, siz va emitent oʻrtasidagi munosabatlar esa emitentingiz shartlari bilan tartibga solinadi. Google sizning birorta toʻlov vositangiz yaxshi holatda ekanligi yoki ushbu tranzaksiya uchun Google Pay’dan foydalanganingizda, toʻlov vositangizning emitenti sotuvchi bilan amalga oshiriladigan har qanday tranzaksiyani avtorizatsiya qilishi yoki tasdiqlashi borasida hech qanday kafolat bermaydi va buni tekshirmaydi.
Google yoki uning filiali emitent boʻlgan holatlar bundan mustasno, na Google va na uning filiallari kredit berish yoki kredit olish huquqini aniqlash jarayonlariga jalb etilmaydi, shuningdek, ular quyidagilarni nazorat qilmaydi: Toʻlov usullari yoki mablagʻlarning mavjudligi yoxud aniqligi; Toʻlov usullarining Google Payga taqdim etilishi (yoki qoʻshilishi) yoki Toʻlov usuli balanslariga mablagʻ qoʻshilishi. Yuqoridagilarga oid har qanday savol yoki muammolar yuzasidan toʻlov usulingizni taqdim etgan emitentga murojaat qilishingizni soʻraymiz.
Google Pay orqali Virtual karta raqami yoki Ulangan uchinchi tomon hisobini saqlashda quyidagi qoʻshimcha shartlar amal qiladi.
Google Payga toʻlov vositasini qoʻshishni boshlab, Google va/yoki toʻlov usuli emitentingiz soʻragan maʼlumotlarni taqdim etganingizdan soʻng, Google Pay ushbu toʻlov usulining xizmat bilan foydalanishga yaroqli ekanligini tekshiradi. Ishtirokchi emitentning hamma toʻlov usullari ham yaroqli boʻlavermasligi mumkin. Agar toʻlov usulingizning emitenti Google Pay’ni dastaklasa va toʻlov usulingiz mos boʻlsa, uni qoʻshganingizda siz emitentning shartlari va qoidalarini qabul qilishingizni soʻraydigan ekranni koʻrishingiz mumkin. Buni amalga oshirib, Toʻlov usulini muvaffaqiyatli qoʻshganingizdan soʻng, Google Pay quyidagi 5-boʻlimda tavsiflanganidek foydalanish uchun toʻlov kartangizning haqiqiy raqami oʻrnida ishlatiladigan Virtual karta raqamini saqlaydi yoki Ulangan uchinchi tomon hisobingizni Google hisobingizga bogʻlaydi.
Google Pay orqali roʻyxatdan oʻtkaziladigan Virtual karta raqamlari Google hisobingizga saqlangan har qanday tegishli Toʻlov kartalaridan farq qiladi. Virtual karta raqamidan farqli oʻlaroq, toʻlov kartasi odatda sizga tegishli jismoniy kartaga oʻxshash dizayn bilan koʻrsatilmaydi va undan doʻkonlarda Yaqindagi simsiz aloqa (“NFC”) orqali tranzaksiyalarni amalga oshirishda foydalanib boʻlmaydi. Biroq, Virtual karta raqamini roʻyxatdan oʻtkazganingizda, Google Pay unga bogʻlangan Toʻlov kartasini ham Google hisobingizga saqlashi mumkin.
Google Pay tranzaksiya tafsilotlarini boyitilgan formatda va oxirgi tranzaksiyalar tarixingizni Google Pay ilovasida namoyish etish uchun toʻlov usulingiz emitentidan tranzaksiya maʼlumotlarini olishi mumkinligini qabul qilasiz.
Toʻlov usuli muayyan qurilmada Google Paydan olib tashlanishi va Xizmat doirasida yaroqsiz boʻlib qolishi mumkin, agar: (i) toʻlov usulini Google Paydan oʻchirib tashlasangiz; (ii) toʻlov usulini Google hisobingizdan oʻchirib tashlasangiz; (iii) Android qurilmalar menejeri yordamida mobil qurilmangizdagi maʼlumotlarni butunlay oʻchirib yuborsangiz; (iv) Google hisobingizni oʻchirib tashlasangiz; (v) mobil qurilmangiz ketma-ket 90 kun davomida birorta ham Google mahsuloti yoki xizmatiga ulanmasa; (vi) qurilmada ketma-ket 12 oy davomida Google Paydan foydalanmasangiz; va/yoki (vii) toʻlov usulingiz emitenti yoki toʻlov tarmogʻi Googlega ushbu toʻlov usulini Google Paydan olib tashlash haqida koʻrsatma bersa.
Google Pay sizga “Sotuvchi” bilan toʻlov tranzaksiyasini amalga oshirish imkonini berishi mumkin. Bu yerda “Sotuvchi” deganda quyidagilar tushuniladi: (i) Google guruhiga kiruvchi kompaniya yoki (ii) Google marketpleyslarining birida yoki bir nechtasida (bu yerda keltirilgan) ishtirok etuvchi, sizga mahsulot, tovar yoki xizmatlarni sotishni taklif qiluvchi hamda Google yoki uning filiallaridan oʻz nomidan toʻlov tranzaksiyalarini qayta ishlashni soʻraydigan har qanday boshqa sotuvchi.
Sotuvchi bilan amalga oshiradigan tranzaksiyangiz (“Google tranzaksiyasi”) faqat siz va Sotuvchi oʻrtasidagi kelishuv ekanini qabul qilasiz va bunga rozilik bildirasiz. Google va uning filiallari Google tranzaksiyalari hamda ularga doir xaridlaringizda ishtirokchi tomon hisoblanmaydi. Shuningdek, ular biror-bir Google tranzaksiyasida xaridor yoki sotuvchi sifatida qatnashmaydi, faqatgina (masalan, Google tomonidan boshqariladigan veb-sayt yoki interfeysdagi tegishli tovar, mahsulot yoxud xizmat tavsifida yoki sahifasida) bu haqda aniq koʻrsatilgan hollar bundan mustasno.
Google tranzaksiyasini boshlaganingizda, Google toʻlov vaqtida sizga mavjud toʻlov usullarini taklif qilishi mumkin. Siz foydalanmoqchi boʻlgan Toʻlov usulini tanlaganingizdan soʻng, Google ushbu Toʻlov usulidan mablagʻ yechib olishi yoki Toʻlov usuli hamda unga oid tafsilotlarni oʻzining filiallaridan biriga taqdim etishi mumkin, shundan soʻng ushbu filial Sotuvchi nomidan tranzaksiyani amalga oshiradi. Google tranzaksiyasini yakunlash uchun zarur boʻlganda Toʻlov usulingizdan mablagʻ yechib olinishiga yoki debet qilinishiga ruxsat berasiz. Shuningdek, Google tranzaksiyasiga oid bekor qilishlar, qaytarmalar yoki tuzatmalar munosabati bilan Toʻlov usulingizga mablagʻ qayta kiritilishiga ruxsat berasiz.
Muayyan Google tranzaksiyasiga oid tafsilotlar yoki shartlar, jumladan, pulni qaytarish yoki nizolarni hal qilish siyosati bilan tanishish uchun siz tranzaksiya amalga oshirgan Sotuvchi tomonidan taqdim etilgan xizmat shartlari, yordam markazi yoki boshqa qoʻllab-quvvatlash materiallariga murojaat qiling.
Agar siz tanlagan toʻlov usulidan toʻlov olishda muammo yuzaga kelsa, Google siz Google Pay’ga saqlagan boshqa har qanday amaldagi toʻlov usulidan foydalanishi mumkin. Toʻlov usullarini boshqarish uchun Google Pay veb-sayti, Google Pay ilovasi yoki Android qurilmangizdagi Google sozlamalariga kiring. Shuningdek, avvalgi Google tranzaksiyasi toʻlov tarmogʻi tomonidan rad etilgan yoki qaytarilgan holatlarda, Sotuvchi xarid uchun Google tranzaksiyasini qayta ishlash maqsadida toʻlov tarmogʻiga bir yoki bir necha marta qayta yuborishi mumkinligiga rozilik bildirasiz. Google shubhali tranzaksiyalar yoki firibgarlik, nojoʻya qilmishlar yoxud amaldagi qonunchilik, Shartlar yoki Google’ning boshqa tegishli siyosatlarini buzishi mumkin boʻlgan amallar aniqlangan taqdirda, toʻlovlarni qayta ishlashni oʻzining mutlaq ixtiyoriga koʻra kechiktirishi mumkin.
Agar Sotuvchi sizga obunalar uchun toʻlov qilish imkoniyatini taqdim etsa, obuna xaridi vaqtida “qabul qilish va xarid qilish” (yoki shunga oʻxshash maʼnodagi) tugmasini bosganingizdan soʻng obunangiz faollashadi. Mazkur tranzaksiya takrorlanuvchi hisob-kitob tartibida amalga oshiriladi. Agar boshqacha koʻrsatilmagan boʻlsa, obunangiz va tegishli billing avtorizatsiyasi siz tomonidan bekor qilinmaguncha muddatsiz davom etadi. “Qabul qilish va sotib olish” (yoki shunga oʻxshash) tugmasini bosish orqali siz Sotuvchiga obuna uchun har bir belgilangan hisob-kitob davrida tanlangan toʻlov usulingizdan mablagʻ yechib olish vakolatini berasiz. Obuna davrida Google tranzaksiyasi summasi Sotuvchi tomonidan oʻzgartirilishi mumkin. Obunani bekor qilganingizda, u joriy hisob-kitob davri yakunlanguniga qadar oʻz kuchida qoladi. Joriy hisob-kitob davri uchun toʻlov qaytarilmaydi, biroq ushbu davr yakuniga qadar tegishli obunadan foydalanish imkoniyati sizda saqlanib qoladi.
Google Pay orqali Sotuvchidan boshqa har qanday tomon bilan toʻlov tranzaksiyasini amalga oshirganingizda (bunday tomon “Uchinchi tomon” va bunday tranzaksiya “Uchinchi tomon tranzaksiyasi” deb ataladi), Google ushbu Uchinchi tomonga toʻlov usulingizdan mablagʻ yechib olish imkonini berish uchun toʻlov usulingiz tafsilotlari va unga tegishli maʼlumotlarni taqdim etishi mumkin. Uchinchi tomonning turiga qarab, Uchinchi tomon tranzaksiyasi tovar yoki xizmatlar xaridi uchun yoxud xayriya yoki hadyalar kabi boshqa maqsadlarda amalga oshirilishi mumkin. Uchinchi tomon tranzaksiyasi quyidagi hollarda amalga oshirilishi mumkin: doʻkonlarda NFC, shtrix-kodlar yoki boshqa kontaktsiz texnologiyalar yordamida “teginib toʻlash” funksiyasidan foydalanganingizda; Uchinchi tomonning veb-sayti yoki ilovasida onlayn xarid paytida toʻlov usuli sifatida “Google Pay” yoki “Google Pay bilan sotib olish” tugmasini tanlaganingizda; yoxud Uchinchi tomon bilan Google Assistent kabi boshqa onlayn interfeyslar orqali bogʻlanib, bitim tuzganingizda. Onlayn tranzaksiyani boshlaganingizda, Google Pay tranzaksiyani yakunlash uchun zarur boʻlsa, Google hisobingizda saqlangan hisob-kitob, yetkazib berish yoki email manzili kabi boshqa maʼlumotlarni ham ulashishi mumkin.
Uchinchi tomon tranzaksiyasida toʻlov usuli va boshqa maʼlumotlar Uchinchi tomonga taqdim etilgandan soʻng, Google mazkur tranzaksiyada boshqa ishtirok etmaydi hamda bunday tranzaksiya faqat siz va Uchinchi tomon oʻrtasida amalga oshishini, Google yoki uning filiallari bunga aloqador emasligini qabul qilasiz va bunga rozilik bildirasiz. Uchinchi tomon tranzaksiyalari bilan bogʻliq har qanday masalalar, jumladan, mablagʻni qaytarish va nizolar boʻyicha bevosita Uchinchi tomonning oʻziga yoki Toʻlov usuli taʼminotchisiga (masalan, Toʻlov kartangizni chiqargan emitentga) murojaat qilishingiz lozim.
Ishtirok etuvchi Uchinchi tomonning veb-sayti yoki ilovasiga kirganingizda, uchinchi tomon sizga Google Pay orqali toʻlov qilish imkoniyatini taklif qilish-qilmaslikni aniqlashi uchun Google (agar uchinchi tomon soʻrov yuborsa) qurilmangizda Google Pay sozlangan yoki sozlanmaganini unga maʼlum qilishi mumkin. Biroq, agar Uchinchi tomon Google Pay xizmatini barcha foydalanuvchilarga toʻlov usuli sifatida taklif qilsa, siz uchinchi tomon veb-sayti yoki ilovasida Google Pay orqali toʻlov qilish imkoniyatini baribir koʻrishingiz mumkin. Google Pay maxfiylik sozlamalarida Google tomonidan bunday maʼlumotlar oshkor qilinishidan voz kechishingiz mumkin. Bundan voz kechish ayrim sotuvchilar bilan Google Pay xizmatidan foydalanish imkoniyatingizni cheklab qoʻyishi mumkin. Agar shaxsiy Google hisobingizni boshqarish uchun talab qilingan yoshga yetmagan boʻlsangiz, bu qoida sizga tatbiq etilmaydi va Google bu maqsadda maʼlumotlaringizni oshkor qilmaydi.
Agar siz Google Chrome brauzerida yoki Android qurilmangizda “Avtomatik kiritish” funksiyasini yoqqan boʻlsangiz, Google Pay sizga saqlangan toʻlov usuli va manzil maʼlumotlaringizni Chrome brauzeridagi uchinchi tomon veb-saytining toʻlov shaklida yoki Android qurilmasidagi tashqi ilovaning toʻlov shaklida avtomatik ravishda toʻldirish imkoniyatini taklif qilishi mumkin. (Avtomatik kiritish funksiyasi Google Pay bilan qanday ishlashi haqida batafsil ma’lumot olish uchun Chrome yordam markaziga kiring). Ushbu funksiyadan foydalanganingizda, Google uchinchi tomon veb-sayti yoki ilovasi bilan oʻzaro aloqaga kirishmaydi, balki faqatgina uchinchi tomon shaklidagi muayyan tanlangan maʼlumotlarni avtomatik toʻldirish haqidagi soʻrovingizni bajaradi. Google Chrome yoki Android Avtomatik kiritish funksiyasi orqali amalga oshirilgan birorta ham tranzaksiyaga aloqador emas hamda bunday tranzaksiya faqat siz va Uchinchi tomon oʻrtasida ekanini, Google yoki uning filiallari bunga daxldor emasligini tan olasiz va bunga rozilik bildirasiz. Chrome yoki Android avtomatik kiritish funksiyasidan foydalanilgan tranzaksiyalar bilan bogʻliq har qanday muammo yuzaga kelsa, bevosita uchinchi tomon yoki toʻlov usulingizni taqdim etgan emitent bilan bogʻlanishingiz lozim.