Google Payments Құпиялық мәлімдемесі

Соңғы өзгертілген күні: 2026 жылдың 16 наурызы

Google Құпиялық саясатында сіз Google өнімдері мен қызметтерін пайдаланған кезде, жеке ақпаратыңыз қалай өңделетіні сипатталған. 18 жасқа толмаған пайдаланушы болсаңыз, қосымша ресурстарды Google-дың жасөспірімдерге арналған құпиялық нұсқаулығынан және балаларға арналған Google Payments құпиялық нұсқаулығынан таба аласыз.

Google Payments қызметі Google аккаунтының иелеріне ұсынылады, сол себепті оны пайдалануыңыз Google Құпиялық саясатына сәйкес реттеледі. Сондай-ақ осы Құпиялық мәлімдемесінде Google-дың Google Payments-ке арналған құпиялық шаралары берілген.

Google Payments-ті пайдалануыңыз Google Payments Қызмет көрсету шарттарына сәйкес реттеледі. Онда Құпиялық мәлімдемесі бойынша көрсетілетін қызметтер жан-жақты сипатталған. Осы Құпиялық мәлімдемесінде анықталмаған бас әріппен жазылған терминдер Google Payments Қызмет көрсету шарттарында көрсетілген мағынаға ие болады.

Google Payments Құпиялық мәлімдемесі Google LLC компаниясы немесе ол толықтай иелік ететін еншілес ұйымдар, соның ішінде Google Payment Corp. ("GPC") ұсынатын қызметтерге қатысты қолданылады. Қызметті қандай еншілес ұйымның ұсынатынын білу үшін қызмет аясында берілген Google Payments Қызмет көрсету шарттарын қараңыз.

Бразилияда тұратын пайдаланушылардың ақпаратына жауапты дерек бақылаушысы – Google LLC, бірақ Бразилия заңы бойынша талап етілсе, Google Brasil Pagamentos Ltda болуы мүмкін.
Еуропалық экономикалық аймақтағы (Біріккен Корольдікті қоспағанда) пайдаланушылардың (Google маркетплейсіндегі сатушыларды қоспағанда) ақпаратына жауапты дерек бақылаушысы – Google Ireland Limited.
Еуропалық экономикалық аймақта (Біріккен Корольдікті қоспағанда) тұратын және Google маркетплейсінде сататын пайдаланушылардың ақпаратына жауапты дерек бақылаушысы – Google Payment Ireland Limited.
Біріккен Корольдіктегі пайдаланушылардың (Google маркетплейсіндегі сатушыларды қоспағанда) ақпаратына жауапты дерек бақылаушысы – Google LLC.
Біріккен Корольдікте немесе Израильде тұратын және Google маркетплейсінде сататын пайдаланушылардың ақпаратына жауапты дерек бақылаушысы – Google Payment Limited.
Google Payments Құпиялық мәлімдемесі Үндістанда тұратын пайдаланушыларға Google India Digital Services Private Limited ұсынатын Google Pay қызметіне қолданылмайды.

Біз жинайтын ақпарат

Google Құпиялық саясатында берілген ақпаратпен қоса, келесі мәлімет те жиналуы мүмкін:

Тіркеу туралы ақпарат

Google Payments қызметіне тіркелгенде, Google аккаунтыңызбен байланысты Google төлемдер профилін жасайсыз. Google Құпиялық саясатында көрсетілген ақпаратпен қатар, қолданылатын Google Payments қызметтеріне байланысты сізден келесі ақпарат жіберу сұралуы мүмкін:

несиелік немесе дебеттік карта нөмірі және картаның жарамдылық мерзімі;
банк шотының нөмірі және жарамдылық мерзімі;
мекенжай;
телефон нөмірі;
туған күніңіз;
әлеуметтік сақтандыру нөмірі немесе салық төлеушінің сәйкестендіру нөмірі (немесе мемлекеттік орган берген жеке куәлік нөмірлері);
сатушылар немесе компаниялар үшін: компания санаты және сауда немесе транзакциялар көлемі туралы белгілі бір ақпарат.

Кейбір жағдайларда ақпаратты немесе жеке басыңызды растау үшін сізден қосымша ақпарат жіберуді немесе қосымша сұрақтарға жауап беруді сұрауымыз да ықтимал. Оператордың төлем аккаунтын тіркесеңіз, сізден оператор аккаунты туралы белгілі бір ақпаратты жіберуді сұраймыз.

Тіркеу туралы ақпаратыңыз Google аккаунтыңызбен байланыстырылып сақталады және Google серверлерінде болады. Белгілі бір дерек түрлері мобильдік құрылғыда да сақталуы мүмкін.

Үшінші тараптардан алынған ақпарат

Сіз туралы ақпаратты үшінші тараптардан, соның ішінде үшінші тараптың растау қызметтерінен алуымыз мүмкін. Атап айтқанда:

сауда орындарындағы Google Payments транзакцияларынан алынған ақпарат;
үшінші тараптар берген және Google Payments-пен байланыстырылған төлеу әдістерін және аккаунттарыңызды пайдалану туралы ақпарат;
карта эмитентінің немесе қаржы институтының тіркеу мәліметтері;
төлеу әдісіңізге қатысты функциялар мен бонустар туралы ақпарат;
Google төлемдер профиліңіздегі балансты пайдалану мүмкіндігі туралы ақпарат;
оператор берген төлем туралы ақпарат;
тұтынушылар туралы есептер ("тұтынушылар туралы есептер" термині АҚШ-тың "Шынайы несиелік ақпарат беру туралы" заңында анықталған);
үшінші тараптармен, мысалы, сатушылармен және төлем қызметін көрсетушілермен болған транзакцияларыңыз туралы ақпарат (алаяқтық қаупін модельдеу, үшінші тараптарға алаяқтық қаупінің көрсеткіштерін беру және алаяқтықтың алдын алудың басқа да қызметтерін ұсыну үшін пайдаланылады).

Сатушыларға келетін болсақ, сіз және бизнесіңіз туралы ақпаратты несиелік бюродан немесе компания туралы ақпарат қызметінен ала аламыз.

Транзакция туралы ақпарат

Транзакция жасау үшін Google Payments қызметін пайдалансаңыз, біз осы транзакция туралы ақпаратты, соның ішінде мына деректерді жинай аламыз:

транзакция күні, уақыты және сомасы;
сатушының орналасқан жері және сипаттамасы;
сатып алынған тауарлардың немесе қызметтердің сатушы ұсынған сипаттамасы;
транзакциямен байланыстырғыңыз келетін кез келген фотосурет;
сатушы мен сатып алушының (немесе жіберуші мен алушының) аттары мен электрондық мекенжайлары;
қолданылатын төлеу әдісінің түрі;
транзакция себебінің және транзакцияға қатысты ұсыныстың сипаттамасы (бар болса).

Жиналған ақпарат қалай қолданылады?

Бізге, Google Payment Corp. (GPC) компаниясына немесе басқа еншілес ұйымдарымызға жіберетін ақпаратыңызды, сондай-ақ сіз туралы үшінші тараптан алған мәліметті Google Құпиялық саясатында берілген себептерге сәйкес келесі мақсаттарда қолданамыз:

сізге Google Payments қызметін көрсету (тұтынушыларға қызмет көрсету аясында);
Google-дың, пайдаланушылардың немесе қоғамның құқықтарына, меншігіне не қауіпсіздігіне төнетін қауіптің алдын алу, соның ішінде алаяқтыққа, фишингіге немесе басқа заңсыз әрекетке жол бермеу;
үшінші тараптың сіз сұраған өнімдерді не қызметтерді қамтамасыз етуіне көмектесу;
қызмет көрсету шарттарына сай екеніңізді анықтау үшін Google төлемдер профиліңізді тексеру;
болашақ Google Payments транзакцияларыңыз туралы шешім қабылдау;
бұрынғы және қазіргі ақпаратыңыз бойынша алаяқтық қаупінің модельдерін құру және жаттықтыру, сондай-ақ алаяқтықтың немесе ереже бұзудың алдын алу мақсатында үшінші тараптарға берілетін алаяқтық қаупі көрсеткіштерін анықтау;
төлеу әдісіңіздің функциялары мен бонустары туралы ақпарат беру;
сіз бастаған Google Payments транзакцияларына қатысты басқа да заңды бизнес қажеттіліктерін қанағаттандыру;
Google Payments және Google қызметтерінің қалай қолданылатынын түсіну үшін талдаулар мен өлшеулер жүргізу, оның ішінде жарнамалардың өнімділігін (кейбір елдерде) бағалау;
Google Payments және басқа да Google қызметтерін қолдану тәжірибесін жекелендіру, оның ішінде жарнамаларды параметрлерге байланысты (кейбір елдерде) жекелендіру.

Сіз берген ақпаратты Google Payments қызметін пайдалану мерзімі бойы, сондай-ақ біздің заңды және нормативтік міндеттемелерімізді орындау үшін қажет қосымша мерзім бойы сақтай аламыз.

Біз бөлісетін ақпарат

Жеке ақпаратты басқа компаниялармен немесе Google қызметкері емес жеке тұлғамен тек келесі жағдайларда бөлісеміз:

Google Құпиялық саясатында рұқсат берілсе;
заңмен рұқсат етілсе;
транзакцияңызды өңдеу және аккаунтыңызға қызмет көрсету, соның ішінде қауіпсіздікті арттыру, аккаунтыңызды алаяқтықтан қорғау және басқа да күнделікті бизнес мақсаттары үшін;
үшінші тарап қызметіне тіркелу процесін аяқтау үшін;
Google Pay қолжетімді елдерде сатушының сайты немесе қолданбасы арқылы төлем жасау үшін пайдалануға болатын Google төлемдер профиліңіздің бар-жоғын үшінші тарап сатушысына хабарлау үшін. Оған төлеу әдісі туралы шектеулі мәліметтер (мысалы, карта желісі және карта нөмірінің соңғы 4 цифры) кіруі мүмкін. Бұл параметрді өшіруге болады;
үшінші тараппен жасаған транзакцияларыңызды алаяқтық пен құқық бұзу жағдайларынан қорғау мақсатында Google алаяқтық қаупінің көрсеткіштерін анықтау және оның алдын алу қызметтерін пайдаланатын үшінші тараптармен алаяқтық қаупінің көрсеткіштерін және басқа алаяқтықты бағалау нәтижелерін бөлісу үшін;
төлеу әдісіңіздің қауіпсіздігі мен жарамдылығын қамтамасыз ету және оның функциялары мен бонустары туралы тиісті ақпарат беру үшін (жеке ақпаратыңызды төлеу әдісінің эмитентіне, төлем желісіне, төлем өңдеушілерге және олардың серіктестеріне бере аламыз).

Ақпаратты бөлісуге болатын жағдайлардың мысалдары:

Google Payments арқылы зат сатып алсаңыз немесе транзакция жүргізсеңіз, тиісті компанияға не жеке тұлғаға сіз туралы белгілі бір жеке ақпаратты қолжетімді етеміз. Сондай-ақ Google Play-де Google Payments арқылы сатып алсаңыз, жеке ақпарат тиісті әзірлеушіге де жіберіледі.
Google Pay көмегімен веб-сайт немесе қолданба арқылы сатып алсаңыз, біз пошта индексіңізді және төлеу әдісіңіз туралы ақпаратты бөлісе аламыз, осылайша сатушы тапсырысыңыздың құнына байланысты салықтарды, жөнелту құнын және басқа мәліметтерді (мысалы, жеткізу құны мен баға туралы басқа ақпаратты) есептей алады. Сондай-ақ сатушының сізден дәл осы төлем әдісін қабылдай алуы және белгілі бір төлем әдістеріне қатысты бонустар немесе шектеулер анықталады.
Google төлемдер профиліңізге үшінші тарап төлеу әдісін қоссаңыз, біз белгілі бір жеке ақпаратты үшінші тарап төлем қызметін көрсетушімен бөлісіп, сізге қызметті бірлесіп ұсына аламыз. Бұл ақпарат атыңызды, профиль суретіңізді, электрондық мекенжайыңызды, IP мекенжайын, төлем мекенжайын, телефон нөмірін, құрылғы туралы ақпаратты, орналасқан жеріңізді және Google аккаунтын пайдалану тарихын қамтуы мүмкін.
Google Pay қолжетімді елдерде төлеу процесін ыңғайлы ету және бағдарламаға қатысатын сатушылардың сайттарына немесе қолданбаларына кірген кезде тиісті төлем опцияларын ұсыну үшін, сатушы сізде Google төлемдер профилі және жарамды төлеу әдісі бар-жоғын тексеруі мүмкін. Бұл процесс барысында Google төлеу әдісіңіз туралы шектеулі мәліметтерді (мысалы, карта желісін және карта нөмірінің соңғы 4 цифрын) таңдалған төлеу әдісін анықтауға көмектесу мақсатында бөлісуі мүмкін.
Үшінші тараппен (мысалы, сатушылармен және төлем қызметін көрсетушілермен) транзакция жасасаңыз, біз алаяқтықтың немесе құқық бұзу жағдайларының алдын алу мақсатында осы транзакцияға қатысты алаяқтық қаупінің көрсеткіштерін және басқа алаяқтықты бағалау нәтижелерін жібере аламыз.

Біз жинайтын ақпарат, соның ішінде үшінші тараптардан алынған мәліметтер үлестес компанияларымызға (Google LLC иелік ететін және басқаратын басқа компанияларға) жіберілуі мүмкін. Бұл үлестес тұлғалар қаржылық та, қаржылық емес те ұйымдар болуы мүмкін және осындай ақпаратты Құпиялық мәлімдемесінде және Google Құпиялық саясатында көрсетілген мақсаттарда, соның ішінде өздерінің күнделікті бизнес мақсаттары үшін пайдаланатын болады.

Белгілі бір жағдайларда GPC және оның үлестес компанияларына белгілі бір ақпаратты жіберуден бас тарту құқығыңыз бар. Атап айтқанда, келесі әрекеттерден бас тартуға болады:

GPC және оның үлестес компанияларына несие төлеу қабілетіңіз туралы ақпаратты олардың ішкі бизнес мақсаттарында пайдалану үшін жіберу;
біз жинап, бөлісетін жеке ақпаратыңызды негізге алып, үлестес компанияларымыздың өнімдер мен қызметтерді сатуы. Бұл ақпаратқа біздегі аккаунтыңыздың тарихы да жатады.

Google LLC немесе оның үлестес компанияларының сіз сайтына не қолданбасына кіретін үшінші тарап сатушысына Google төлемдер профиліңіздің бар-жоғын хабарлау әрекетінен де бас тарта аласыз.

Бұл параметрді өшірсеңіз, шешіміңізді өзгерткенше таңдауыңыз өз күшінде болады.

Несие төлеу қабілетіңіз туралы ақпаратты GPC және оның үлестес компанияларына жібергенімізді, үлестес компаниялар біз жинаған және бөліскен жеке ақпаратыңызды сізге тауар ұсыну үшін қолданғанын немесе Google LLC не оның үлестес компаниялары сіз сайтына не қолданбасына кіретін сатушыға Google төлемдер профиліңіздің бар-жоғын хабарлағанын қаламасаңыз, аккаунтқа кіріп, Google Payments-тің құпиялық параметрлері бетіне өтіп, құпиялық параметрлерін өзгертсеңіз болады.

Осы Құпиялық мәлімдемесінде не Google Құпиялық саясатында берілген жағдайларды қоспағанда, жеке ақпаратты GPC компаниясынан немесе үлестес компаниялардан басқа тараптармен бөліспейміз. Google Payments – Google аккаунт иелеріне ұсынылатын өнім. Осы Құпиялық мәлімдемесіндегі бас тарту шарттары Google аккаунтына тіркелу үшін Google LLC компаниясына жіберетін деректеріңізге әсер етпейді.

Ақпаратыңыздың қауіпсіздігін қамтамасыз ету

Қауіпсіздік шаралары туралы қосымша ақпарат алу үшін негізгі Google Құпиялық саясатын қараңыз.

Google төлемдер профилінің қауіпсіздігі аккаунт құпия сөздерін, PIN кодтарын және қызметке кіру туралы басқа ақпаратты құпия сақтауыңызға байланысты.

Google аккаунты туралы ақпаратты үшінші тараппен бөліссеңіз, ол Google төлемдер профиліңізге және жеке ақпаратыңызға қол жеткізе алады.
Мобильдік құрылғыңызға және құрылғыдағы Google Wallet-ке кіру рұқсатын басқару, соның ішінде құпия сөздер мен PIN кодтарын құпия сақтау үшін өзіңіз жауаптысыз.
Google Payments-тегі ақпаратқа қауіп төнген кезде, Google-ға немесе сәйкес серіктеске хабарлауға да сіз жауаптысыз.

Үшінші тарап сатушысына, веб-сайтына немесе қолданбасына сіз тікелей беретін ақпарат бұл Құпиялық мәлімдемесінде қамтылмаған. Жеке ақпаратыңызды өзіңіз тікелей жібергенде, сатушылардың немесе басқа үшінші тараптардың құпиялық не қауіпсіздік шараларына біз жауапкершілік алмаймыз. Ондай жағдайда үшінші тараптың құпиялық саясатын көруге кеңес береміз.