Njoftim privatësie i Google Payments

Ndryshuar për herë të fundit: 28 mars 2022

"Politika e privatësisë" e Google përshkruan mënyrën se si ne i trajtojmë informacionet e tua personale kur ti përdor produkte dhe shërbime të Google. Nëse je një përdorues nën 18 vjeç, ti mund të gjesh burime shtesë në Udhëzuesin e privatësisë të Google për adoleshentët. Google Payments i ofrohet titullarëve të "Llogarive të Google" dhe përdorimi i saj nga ana jote i nënshtrohet "Politikës së privatësisë" të Google. Përveç kësaj, "Njoftimi i privatësisë" përshkruan praktikat e privatësisë të Google të cilat janë specifike për Google Payments.

Përdorimi i Google Payments nga ana jote rregullohet nga "Kushtet e shërbimit" të Google Payments, të cilat përshkruajnë më në detaj "Shërbimet" që mbulohen nga ky "Njoftim privatësie". Termat me germa kapitale që nuk janë përcaktuar në "Njoftimin e privatësisë" të Google Payments kanë kuptimin që i është caktuar në "Kushtet e shërbimit" të Google Payments.

"Njoftimi i privatësisë" i Google Payments zbatohet për "Shërbimet" e ofruara nga Google LLC apo nga filialet në zotërim të plotë të tij, duke përfshirë Google Payment Corp. ("GPC"). Shiko "Kushtet e shërbimit" të Google Payments që të janë vënë në dispozicion brenda "Shërbimit" për të mësuar se cili filial e ofron "Shërbimin". Për përdoruesit (përveç atyre që shesin në një treg të Google) me bazë në Zonën Ekonomike Evropiane (duke përjashtuar Mbretërinë e Bashkuar), kontrolluesi i të dhënave që është përgjegjës për informacionet tuaja është Google Ireland Limited. Për përdoruesit (përveç atyre që shesin në një treg të Google) me bazë në Mbretërinë e Bashkuar, kontrolluesi i të dhënave që është përgjegjës për informacionet tuaja është Google LLC. Nëse ndodhesh me bazë në Zonën Ekonomike Evropiane, duke përjashtuar Mbretërinë e Bashkuar dhe je duke shitur në një treg të Google, kontrolluesi i të dhënave që është përgjegjës për informacionet e tua është Google Payment Ireland Limited. Nëse ndodhesh me bazë në Mbretërinë e Bashkuar dhe je duke shitur në një treg të Google, kontrolluesi i të dhënave që është përgjegjës për informacionet e tua është Google Payment Limited. Për përdoruesit me bazë në Brazil, kontrolluesi i të dhënave që është përgjegjës për informacionet tuaja është Google LLC dhe deri në masën e kërkuar sipas ligjit të Brazilit, mund të jetë dhe Google Brasil Pagamentos Ltda.

Informacionet që ne mbledhim

Përveç informacioneve të listuara në "Politikën e privatësisë" të Google, ne gjithashtu mund të mbledhim sa më poshtë:

Informacionet e regjistrimit – Kur regjistrohesh për Google Payments, ti krijon një "Llogari të Google Payments" që është e lidhur me "Llogarinë tënde të Google". Në varësi të shërbimeve të Google Payments që ti përdor, përveç informacioneve të listuara në "Politikën e privatësisë" të Google, mund të të kërkohet të japësh informacionet e mëposhtme: numrin e kartës së kreditit ose të debitit dhe datën e skadimit të kartës, numrin e llogarisë bankare dhe datën e skadimit, adresën, numrin e telefonit, datëlindjen, numrin e sigurimeve kombëtare ose numrin e identifikimit të tatimpaguesit (ose ndonjë numër tjetër identifikimi zyrtar) dhe për shitësit ose bizneset në veçanti, kategorinë e biznesit dhe informacione të caktuara rreth vëllimit të shitjeve ose të transaksioneve. Në disa raste, mund të të kërkojmë të na dërgosh informacione shtesë ose që t'i përgjigjesh pyetjeve shtesë për të ndihmuar në verifikimin e informacioneve të tua. Së fundi, nëse regjistron një llogari faturimi "Operatori", do të të kërkojmë të na japësh informacione të caktuara rreth llogarisë së "Operatorit".
Informacionet e marra nga palë të treta – Ne mund të marrim informacione për ty nga palë të treta, duke përfshirë shërbimet e verifikimit të palëve të treta. Kjo përfshin informacionet që vijnë nga transaksionet me Google Payments në vendndodhjet e tregtarit, informacionet që lidhen më përdorimin e mënyrave të tua të pagesës dhe llogaritë e tua të lëshuara nga palë të treta që janë të lidhura me Google Payments, identitetin e lëshuesit të kartës sate apo të institucionit financiar, informacione në lidhje me qasjen te balancat e mbajtura në "Llogarinë tënde të Google Payments", informacionet nga një "Operator" në lidhje me "Operatorin" ose dhe raportet e konsumatorëve, ashtu siç termi "raportet e konsumatorëve" përcaktohet nga ligji "Për raportimin e kreditit të drejtë në SHBA". Gjithashtu, për shitësit, ne mund të marrim informacione rreth jush apo biznesit tuaj nga një byro krediti ose nga një shërbim për informacionin e biznesit.
Informacionet e transaksioneve – Kur përdor Google Payments për të kryer një transaksion, ne mund të mbledhim informacione rreth transaksionit, duke përfshirë datën, orën dhe shumën e transaksionit, vendndodhjen dhe përshkrimin e tregtarit, një përshkrim të dhënë nga shitësi i mallrave apo shërbimeve të blera, një fotografi me të cilën ke zgjedhur të shoqërosh transaksionin, emrat dhe adresat e email-it të shitësit dhe të blerësit (ose të dërguesit dhe të marrësit), llojin e mënyrës së përdorur të pagesës, përshkrimin e arsyes për transaksionin dhe ofertën e lidhur me transaksionin, nëse ka.

Si i përdorim informacionet që mbledhim

Përveç përdorimeve të listuara në "Politikën e privatësisë" të Google, ne përdorim informacionet që na ke dhënë ne dhe GPC-së ose një filiali tjetër tonin, si dhe informacionet rreth teje nga palët e treta, në mënyrë që të të ofrojmë Google Payments për qëllime të shërbimit të klientit dhe për të parandaluar cenimin e të drejtave, të pronësisë apo sigurisë së Google, përdoruesve tanë ose të publikut, duke përfshirë ndihmën në parandalimin e mashtrimeve apo shkeljeve të tjera. Informacione të tilla mund të përdoren gjithashtu për të ndihmuar palë të treta që të të ofrojnë produkte ose shërbime që ti kërkon nga ata. Gjithashtu, ne i përdorim informacionet për të shqyrtuar "Llogarinë tënde të Google Payments", për të përcaktuar nëse ti vazhdon t'i përmbushësh kushtet e llogarisë, për të marrë vendime rreth transaksioneve të ardhshme me Google Payments dhe për nevoja të tjera ligjore të biznesit që lidhen me transaksionet me Google Payments të nisura nga ti.

Informacioni yt i regjistrimit ruhet në lidhje me "Llogarinë tënde të Google" dhe regjistrimi nga ana jote i një mënyre pagese do të ruhet në serverët e Google. Përveç kësaj, elementë të caktuar të të dhënave mund të ruhen gjithashtu në pajisjen tënde celulare. Ne mund të mbajmë informacionet që ti ke dhënë për periudha të zgjatura kohore, me qëllim për të qenë në përputhje me procesin ligjor dhe detyrimet rregullatore.

Informacionet që ne ndajmë

Ne do t'i ndajmë informacionet e tua personale me kompani ose individë të tjerë jashtë Google vetëm në rrethanat e mëposhtme:

Siç lejohet sipas "Politikës së privatësisë" të Google.
Sipas nevojës për të përpunuar transaksionet e tua dhe për të mirëmbajtur llogarinë tënde, duke përfshirë ofrimin e përmirësimeve të sigurisë dhe mbrojtjen e llogarisë kundër mashtrimit.
Për të përfunduar regjistrimin tënd për një shërbim të ofruar nga një palë e tretë.
Për të informuar një tregtar palë të tretë, sajtin apo aplikacionin e të cilit viziton, nëse ke një "Llogari të Google Payments" që mund të përdoret për të kryer pagesa nëpërmjet sajtit apo aplikacionit të tregtarit.
Me kartën tënde apo me lëshues ose rrjete pagesash të tjera të mënyrës së pagesës, si dhe me përpunues pagesash dhe organizata të tjera që punojnë në emrin e tyre, për të garantuar sigurinë dhe vlefshmërinë e mënyrës së pagesës dhe transaksioneve të kërkuara me anë të saj.

Për shembull, kur kryen një blerje apo një transaksion duke përdorur Google Payments, ne i ofrojmë kompanisë apo individit nga i cili ke kryer blerje apo me të cilin ke kryer transaksion, informacione të caktuara personale rreth teje. Kjo përfshin shpërndarjen e informacioneve të tua personale me zhvilluesin nga i cili blen kur përdor Google Payments për të kryer një blerje në Google Play. Kjo gjithashtu mund të përfshijë dërgimin e kodit ZIP ose kodit postar te sajti i uebit ose aplikacioni i tregtarit dhe informacione rreth formës sate të pagesës kur ti nis një blerje duke përdorur "Bli me Google Pay" ose një buton të ngjashëm, në mënyrë që tregtari të mund të llogarisë informacionet e përditësuara të blerjes (si p.sh. tatimet, kostot e dërgesës dhe informacione të tjera për çmimin) dhe të identifikojë nëse tregtari mund ta pranojë formën tënde të pagesës nga ty, si dhe përfitimet ose kufizimet për forma të caktuara pagesash për blerjen tënde. Kur shton një mënyrë pagese të një pale të tretë në "Llogarinë tënde të Google Payments", ne mund të shkëmbejmë informacione personale të caktuara rreth teje, si p.sh. emrin, imazhin e profilit, email-in, adresën e IP-së dhe të faturimit, numrin e telefonit, informacionet e pajisjes, informacionet e vendndodhjes dhe të aktivitetit të "Llogarisë së Google", me ofruesin e pagesës palë të tretë, sipas nevojës për të ofruar shërbimin.

Kur viziton sajtin ose aplikacionin e një tregtari pjesëmarrës, tregtari mund të kontrollojë nëse ti ke një "Llogari të Google Payments" me një mënyrë të përshtatshme pagese që mund të përdoret për të kryer blerje nëpërmjet sajtit ose aplikacionit të tregtarit, për të reduktuar mundësinë që ti të shikosh veçori të papërdorshme në sajte apo aplikacione.

Çdo informacion që ti i jep drejtpërdrejt një tregtari, sajti uebi apo aplikacioni të palës së tretë nuk mbulohet nga ky "Njoftim privatësie". Ne nuk mbajmë përgjegjësi për praktikat e privatësisë apo të sigurisë të tregtarëve apo palëve të tjera të treta, me të cilët ti zgjedh të ndash informacionet e tua personale në mënyrë të drejtpërdrejtë. Të inkurajojmë të shqyrtosh politikat e privatësisë të çdo pale të tretë me të cilën zgjedh të ndash informacionet e tua personale në mënyrë të drejtpërdrejtë.

Informacionet që ne mbledhim, duke përfshirë informacionet e marra nga palët e treta, ndahen me filialet tona, që do të thotë me kompanitë e tjera që zotërohen dhe kontrollohen nga Google LLC. Filialet tona, të cilat mund të jenë subjekte financiare dhe jofinanciare, do t'i përdorin këto informacione për qëllimet e tyre të përditshme të biznesit.

Ne të japim të drejtën të tërhiqesh nga ndarje të caktuara midis GPC-së dhe filialeve të saj. Konkretisht, mund të zgjedhësh të tërhiqesh nga:

Ndarja e informacioneve të tua rreth besueshmërisë sate kreditore midis GPC-së dhe filialeve të saj për qëllimet e tyre të përditshme të biznesit; dhe/ose,
Marketingu i produkteve dhe shërbimeve të filialeve tona në bazë të informacioneve të tua personale që ne i mbledhim dhe i ndajmë me to. Këto informacione përfshijnë historikun e llogarisë sate me ne.

Gjithashtu, mund të zgjedhësh të tërhiqesh që Google LLC apo filialet e tij të mos informojnë një tregtar palë të tretë, sajtin apo aplikacionin e të cilit viziton, nëse ke një "Llogari të Google Payments" që mund të përdoret për pagesa nëpërmjet sajtit apo aplikacionit të tregtarit.

Nëse zgjedh të tërhiqesh, zgjedhja jote do të mbetet në fuqi derisa të na thuash që ta ndryshojmë atë.

Nëse nuk dëshiron që ne të shpërndajmë informacionet e tua personale rreth besueshmërisë sate kreditore midis GPC-së dhe filialeve të saj ose nëse nuk dëshiron që filialet tona të përdorin informacionet e tua personale të mbledhura nga ne dhe të ndara me to për të të bërë marketing, ose nëse nuk dëshiron që Google LLC apo filialet e tij të informojnë një tregtar palë të tretë, sajtin apo aplikacionin e të cilit ke vizituar, nëse ti ke një "Llogari të Google Payments", trego preferencat e tua duke u identifikuar në llogarinë tënde, duke shkuar te faqja e cilësimeve të privatësisë të Google Payments dhe duke përditësuar preferencat e tua.

Ne nuk do t'i ndajmë informacionet e tua personale me askënd jashtë GPC-së apo me filialet tona, përveçse siç përshkruhet në këtë "Njoftim privatësie" apo në "Politikën e privatësisë" të Google. Siç shpjegohet më sipër, Google Payments është një produkt i ofruar nga titullarët e "Llogarisë së Google". Të dhënat që i jep Google LLC për qëllimin e regjistrimit për një "Llogari të Google" nuk ndikohen nga dispozitat për tërheqje në këtë "Njoftim privatësie".

Siguria e informacioneve

Për më shumë informacione rreth praktikave tona të sigurisë, shiko "Politikën kryesore të privatësisë" të Google .

Siguria e "Llogarisë sate të Google Payment" varet nëse ti do t'i mbash konfidenciale fjalëkalimet e llogarisë, kodet PIN dhe informacionet e tjera të qasjes për "Shërbimin". Nëse i ndan informacionet e llogarisë me një palë të tretë, ai ose ajo do të ketë qasje në llogarinë tënde dhe informacionet e tua personale.

Është përgjegjësia jote të kontrollosh qasjen në pajisjen tënde celulare dhe në aplikacionin Google Payments në pajisjen tënde, duke përfshirë mbajtjen konfidenciale të fjalëkalimeve dhe/ose kodit PIN dhe duke mos e ndarë atë me askënd. Është gjithashtu përgjegjësia jote të sinjalizosh Google ose partnerin përkatës nëse mendon se siguria e informacioneve në aplikacionin Google Payments është kompromentuar.